Hugleiðing dagsins
Hvert og eitt okkar, sem erum í GA prógraminu, getum á okkar hátt og á okkar hraða upplifað andlega vakningu. Með henni kemur hin djúpstæða vitneskja um það að við séum ekki lengur ein og án hjálpar. Að auki kemur hin djúpstæða meðvitund um að við séum búin að læra ákveðin sannindi sem við getum fært öðrum, svo þau geti hugsanlega líka fengið hjálp.

Held ég sjálfum mér stöðugt reiðubúnum fyrir þá andlegu vakningu sem kemur óhjákvæmilega ef ég vinn Sporin?

Bæn dagsins
Megi ég vera stöðugur og ekki vænta þess að hin nýfundna andlega hlið mín muni skyndilega og óvænt vekja hjá mér vitund um Æðri Mátt. Megi sú vitund vakna svo hægt og hljótt að ég verði ekki var við nákvæmlega hvenær hún kom til. Vísbending um vitund mína um Æðri Mátt getur falist í löngun minni til þess að vinna Tólfta Sporið. Megi ég þá gera mér grein fyrir því að ég hef meðtekið meginreglur GA prógramsins og hef sannlega reynt að beita þeim í daglegu amstri mínu.

Minnispunktur dagsins
Lifa samkvæmt meginreglunum – og láta þær ganga áfram.

Hugleiðing dagsins
Þegar við, á áráttukenndan hátt, reynum að verða fullkomin, þá sköðum við okkur sjálf nær undantekningalaust. Svo dæmi sé tekið þá hættir okkur til að gera úlfalda úr mýflugu, lítil vandamál verða óyfirstíganleg. Annað dæmi er þegar við verðum svekkt, pirruð og örvæntingafull þegar við stöndum ekki undir þeim óraunhæfu væntingum sem við gerum til okkar sjálfs. Og þetta verður svo til þess að við verðum síður í stakk búin til þess að takast á við lífið eins og það er.

Get ég lært að gefa örlítið eftir? Get ég beitt mér, með kyrrum huga, á þann hátt sem er raunhæfur og sem er unnt að ná?

Bæn dagsins
Megi ég sjá að ef ég set mér ómöguleg markmið þá er ég að búa til handhæga afsökun fyrir því að mistakast. Það er lika vísbending um skorti á raunveruleikaskyni, að gera mér ekki grein fyrir eigin getu og hvenær ég geti beitt henni. Megi ég læra að setja mér raunhæf markmið, með hjálp GA og míns Æðri Máttar. Þessi markmið kunna að virðast fáránlega lítil í mínum augum, eftir öll þessi ár þar sem ég setti mér svo ómöguleg markmið að þau voru fullkomlega óraunveruleg. En megi ég, með því að brjóta verkefnin niður í smærri hluta, þá sjá að ég geti áorkað mörgu af því sem mig dreymdi um og er að takast á við.

Minnispunktur dagsins
Að brjóta stór verkefni niður í litla hluta.

Hugleiðing dagsins
GA prógramið kennir mér að stefna að framförum, ekki fullkomnun. Þessi einfalda áminning er mér mikil hughreysting, því í henni felst grundvallarmunurinn á lífi mínu í dag og því hvernig það var áður en ég kom í GA. Fyrir GA þá var fullkomnun – í öllum sínum ómöguleika – mitt helsta markmið. Í dag get ég aftur á móti sætt mig við það að þó svo að mér mistakist endrum og sinnum, þá er ég ekki misheppnaður – og þó svo að sumt gangi ekki upp hjá mér þá er ég ekki ómögulegur. Og ég get unnið Tólf Bataspor GA í sömu sátt við sjálfan mig.

Trúi ég því að einungis Fyrsta Sporið sé hægt að vinna fullkomlega, og að það sem hin Sporin tákni sé fullkomin hugsjón?

Bæn dagsins
Guð, kenndu mér að losa mig við gömlu markmiðin um ofurmannlega fullkomnun í hverju því sem ég geri og segi. Ég geri mér loks grein fyrir því að fullkomnunaráráttan var ávísun á mistök, því ég gat aldrei staðið undir eigin háleitu væntingum. Nú, þegar ég sé loks mynstrið í eigin hegðun, megi ég þá læra að hætta að forrita mig til mistaka.

Minnispunktur dagsins
Ég get leitast við að verða ofur mennskur, en ekki ofurmenni.

Hugleiðing dagsins
Ég er smám saman að læra – reyndar gengur það full hægt stundum – að þegar ég gefst upp í þeirri vonlausu baráttu að reyna að stjórna mínu lífi á minn hátt, þá öðlast ég varanlegan frið og æðruleysi. Fyrir mörg okkar þá er þessi lærdómur óþægilega hægvirkur. Á endanum skilst mér þó að það er í rauninni bara um tvennt að ræða – eigin vilja og vilja guðs. Það sem er í mínu valdi að hafa áhrif á lýtur mínum vilja og það sem ég get ekki haft stjórn á lýtur vilja guðs. Ég reyni því að sætta mig við að það sem ekki undir minni stjórn, það lýtur vilja guðs.

Er ég farinn að gera mér grein fyrir því að með því að fela vilja minn í hendur guði, þá er ég í fyrsta sinn farinn að lifa án ringulreiðar og án kvíða?

Bæn dagsins
Megi ég vænta þess að vilji minn verði í samræmi við hinn alltumlykjandi vilja guðs. Ég bið þess að ég geri mér grein fyrir því ef vilji minn er kominn í vonlaust reiptog við vilja guðs. Megi ég treysta guði til þess að leiða vilja minn samkvæmt sinni áætlun – og að hann geri sinn tilgang að mínum.

Minnispunktur dagsins
Ég vil að minn vilji verði í takt við vilja guðs.

Hugleiðing dagsins
Það gerist orðið æ oftar, eftir því sem bati minn eykst, að ég stend mig að því að vera í kyrrlátri bið eftir því að heyra í auðþekkjanlegri rödd míns æðri máttar. Sú rödd býr innra með mér. Að biðja er fyrir mig tvístefnugata – að svipast eftir og hlusta, að leyta og finna. Einn af uppáhaldstextum mínum úr biblíunni hljóðar svo; “Ver kyrr og vittu að ég er guð.”

Veiti ég mínum æðri mætti kyrrláta og kærleiksríka athygli, viss um að upplýst vitneskja um hans vilja muni birtast mér?

Bæn dagsins
Þar sem ég leytast við að kynnast mínum æðri mætti, megi ég þá öðlast vitneskju um bestu leiðina – fyrir mig – til þess að ná til hans og heyra. Megi ég byrja að skynja bænina, ekki bara að hlusta á hljóminn af eigin rödd. Megi ég skynja guðlegt eðli hans flæða yfir mig. Megi ég finna fyrir einingu með mínum æðri mætti.

Minnispunktur dagsins
Skynja kyrrð Guðs.

Hugleiðing dagsins
Stundum gerist það, á þessum erfiðu dögum sem við upplifum öll endrum og sinnum, að það virðist vera að guð vilji ekki að við séum hamingjusöm. Að hann heimti að við upplifum kvöl og þjáningu í þessu lífi til þess að geta lifað hamingjusöm í því næsta. GA prógramið hefur sýnt mér fram á að þessu er reyndar öfugt farið. Guð vill að ég sé hamingjusamur hér og nú. Ef ég leyfi því að vera svo, þá mun guð jafnvel sýna mér hvernig ég geti látið það rætast.

Neita ég stundum, í þrjósku minni, að sjá leiðina sem guð er að benda mér að fara?

Bæn dagsins
Ég bið þess að ég taki mér ekki hlutverk þess sem þjáist að eilífu, velti mér ekki upp úr harmleiknum og láti sem þjáning sé eini aðgöngumiðinn að himnaríki. Megi ég þess í stað opna augun fyrir grósku jarðar og kærleika hennar, sem er nægur vitnisburður þess að lífi okkar sé ætlað annað og meira en hrösun eftir hrösun. Megi ranghugmyndir um illviljaðan guð, sem bíður færis að leggja fyrir okkur gildru, ekki afbaka samband mitt við kærleiksríkan og fyrirgefandi Æðri Mátt.

Minnispunktur dagsins
Lífið er annað og meira en þjáningin ein.

Hugleiðing dagsins
Sumt fólk er svo miklir kvíðasjúklingar að þeim líður illa ef þau hafa ekki eitthvað til þess að hafa áhyggjur af. Nýliðinn á það til dæmis til að hugsa með sér “Þetta er of gott til að endast.” Flest okkar hafa nóg af raunverulegum áhyggjum – gömlum skuldum, heilsunni, dauðanum og sköttum, svo eitthvað sé nefnt. GA kennir okkur aftur á móti að það sem virkar best gegn kvíða er traust og tiltrú – ekki á okkur sjálf heldur á okkar Æðri Mátt.

Mun ég halda áfram að trúa því að guð geti og vilji bægja frá ógæfunni sem ég kvíði dag og nótt? Mun ég trúa því að ef ógæfan dynur yfir þá muni guð gera mér kleift að komast í gegnum hana?

Bæn dagsins
Megi ég gera mér grein fyrir því að það muni taka meira heldur en bara tíma að vinna bug á kvíðavananum – kvíða sem sprettur af einhverjum óskilgreindum ótta. Líkt og margir aðrir, þá hef ég lifað með kvíða og áhyggjum svo lengi að það hefur orðið fastur hluti af lífi mínu. Megi minn Æðri Máttur kenna mér að það að gera kvíðann að félaga mínum er eyðsla á orku og dregur úr getu minni.

Minnispunktur dagsins
Losum okkur við kvíðavanann.

Hugleiðing dagsins
Sumum okkar, sem erum félagar í GA, hættir til að gera þau mistök að halda að þær fáu stundir sem eyðum í bæn og hugleiðslu – í að “tala við guð” – séu allt sem til þarf. Sannleikurinn er sá að það er viðhorfið og afstaðan sem við viðhöldum í gegnum daginn sem er alveg jafn mikilvægt. Ef við felum sjálf okkur guði að morgni hvers dags, og erum reiðubúin til þess í gegnum daginn að sætta okkur við vilja hans, þá mun sú sátt, það samþykki, verða að samfelldri bæn.

Get ég reynt að þroska með mér það viðhorf að vera fyllilega sáttur/samþykkur á hverjum degi?

Bæn dagsins
Megi ég viðhalda sambandi við minn Æðri Mátt í gegnum allan daginn, en ekki bara með því að tékka inn til þess að biðja endrum og sinnum. Megi samskipti mín við guð aldrei verða að tilfallandi viðburði. Megi ég gera mér grein fyrir því að í hvert sinn sem ég hegða mér samkvæmt vilja guðs þá er ég að lifa í bæn.

Minnispunktur dagsins
Bænin er viðhorf.

Hugleiðing dagsins
Vinkona mín í GA sagði mér frá uppáhalds sálminum sínum úr bernsku: “Opna augu mín svo ég megi sjá svipmynd sannleikans sem þú ætlar mér.” Og það er í raun það sem GA prógramið hefur gert fyrir mig – það hefur opnað augu mín fyrir raunveruleikanum sem felst í spilafíkn minni og einnig fyrir því gleðiríka lífi sem ég get öðlast ef ég tileinka mér þau gildi sem felast í Tólf Sporum GA.

Er ég, með því að stunda bæn og hugleiðslu, að styrkja og efla sjálfsþekkingu mína það mikið að ég sé farinn að sjá kærleika guðs að verki í sjálfum mér og því sem ég tek mér fyrir hendur?

Bæn dagsins
Megi þau sannleikskorn, sem ég glitti í þegar ég vinn Sporin, byrja að safnast saman og mynda skínandi leiðarstjörnur. Megi ég vita að slíkar stjörnur eru allt sem ég þarf til þess að komast á beinu brautina. Megi ég losna undan þeirri þörf að stoppa í hverri höfn til þess að finna leiðina. Þessar leiðarstjörnur eru ætíð til staðar fyrir mig til þess að finna réttu leiðina.

Minnispunktur dagsins
Finndu leiðarstjörnurnar og fylgdu þeim.

Hugleiðing dagsins
Ef ég er að fara í gegnum erfiða og krefjandi reynslu þessa dagana, þá get ég gert í anda öryggis og trausts. Þökk sé GA og Tólf Sporunum, þá hef ég öðlast þá fullvissu að guð sé með mér á öllum stundum og í öllu sem ég tek mér fyrir hendur. Andi guðs er í mér sem og í fólkinu í kringum mig. Og fyrir bragðið þá líður mér jafnvel notalega í nýjum kringumstæðum sem og á meðal ókunnugra.

Mun ég halda áfram að fylgja prógraminu og vaxa fyrir bragðið, treystandi því að kærleikur guðs sé að verki í mér og mínu lífi?

Bæn dagsins
Megi hughreysting guðs vera með mér í öllum aðstæðum, kunnugum sem ókunnugum. Megi hann endurreisa molnandi stoðir sjálfstrausts míns. Megi ég viðurkenna tilvist guðs í mér og í öðrum í kringum mig. Megi sú sameiginlega upplifun hjálpa mér til þess að eiga í samskiptum, sem eru byggð á heiðarleika, við aðra. Ef ég get lært að treysta guði þá get ég lært að treysta þeim sem deila þessari jarðvist með mér.

Minnispunktur dagsins
Guð kennir mér að treysta.