Hugleiðing dagsins
Áður en ég kynntist GA prógraminu – í reynd, áður en ég vissi af tilvist GA – þá einkenndist líf mitt af hverri kreppunni á fætur annarri. Einstaka sinnum reyndi ég að nota viljastyrkinn til þess að komast á aðra braut, en eins og skip án stýris, þá strandaði ég undantekningarlaust á hindrunum eigin örvæntingar. Í dag nýt ég aftur á móti leiðsagnar míns Æðri Máttar. Og stundum eru skilaboðin sem ég fæ einföld; kyrrð, friður og fullvissa um að allt sé í lagi.

Mun ég reyna að vera þess fullviss að hlutirnir séu að fara á þann veg sem er til góðs fyrir alla hlutaðeigandi, þó svo að ég þurfi hugsanlega að bíða eftir niðurstöðum eða leiðsögn?

Bæn dagsins
Megi ég ekki vænta þess að komast samstundis í samband við minn Æðri Mátt. Megi ég hafa biðlund og þolinmæði til þess að hlusta og skynja að guð sé nálægur. Megi ég taka hinni nýju tilfinningu sem felst í hlýju og friðsæld, sem leið guðs til þess að fullvissa mig að nú sé ég, loksins, farinn að taka réttar ákvarðanir.

Minnispunktur dagsins
Þolinmæði: Skilaboð guðs munu berast.

Hugleiðing dagsins
Hef ég einhvern tíma stoppað til þess að spá í hvort skyndihvötin til þess að “blása út” og segja eitthvað kaldranalegt eða jafnvel kvikindislegt, muni, ef ég læt undan henni, meiða mig mun meira en þann sem ég ætlaði að móðga? Ég verð ætíð að passa upp á að kyrra hugann svo ég hegði mér ekki á hvatvísan eða óvinsamlegan hátt, því hugur minn getur verið – í orðsins fyllstu merkingu – sá mesti óvinur sem ég hef kynnst.

Ætla ég að horfa áður en ég stekk, hugsa áður en ég tala, og reyna að forðast sjálfs-viljann eins og mér er framast unnt?

Bæn dagsins
Megi ég muna að köst mín og sprengingar, uppfull af ásökunum og móðgunum, meiða mig jafnmikið og þann sem þeim er beint að. Megi ég reyna að láta ekki skap mitt og reiði verða að kasti, með því einfaldlega að bera kennsl á reiðina og ofsann og viðurkenna tilvist þeirra.

Minnispunktur dagsins
Látum lokið vera laust.

Hugleiðing dagsins
Henry Ward Beecher skrifaði; “Erfiðleikar eru sendiferðir guðs og þegar við erum send í eina slíka þá ættum við að líta á það sem sönnun á velþóknun guðs.” Ég er byrjaður að sjá að gömlu vandamálin mín voru í raun af mínum eigin völdum. Þó svo að ég hafi ekki séð það á þeim tíma, þá var ég fullkomið dæmi um það sem í GA prógraminu er kallað “óskundi af völdum sjálfs-vilja.” Í dag tek ég erfiðleikum sem merki um tækifæri til þess að vaxa og þroskast og sem sönnun á trausti guðs á mér.

Trúi ég því að guð mun aldrei ætla mér meira en ég get tekist á við?

Bæn dagsins
Megi ég trúa því staðfastlega að guð hafi trú á mér til þess að takast á við eigin vanda, að þau vandamál sem ég stend frammi fyrir séu í réttu hlutfalli við styrk minn og getu mína til þess að standa undir þeim og halda haus. Megi ég líka skilja að það er trú mín á guði sem kemur í veg fyrir að ég brotni niður.

Minnispunktur dagsins
Guð hefur trú á mér, vegna þess að ég hef trú á guði.

Hugleiðing dagsins
Við sjáum oft félaga í GA – biðja heitt og innilega – um leiðsögn guðs í málefnum allt frá miklum erfiðleikum yfir í litilvæg málefni eins og hvað eigi að reiða fram í veislu. Þó svo að þessir félagar meini vel þá er þeim hætt við að þröngva sínum vilja inn í allar aðstæður – í þeirri fullvissu að þau séu að fylgja vilja guðs. Í rauninni eru slíkar bænir ekkert annað en sjálfs-afgreiðsla á heimtingu á “svari” frá guði; þær tengjast lítið því sem GA prógramið mælir fyrir um í Ellefta Sporinu.

Reyni ég eftir fremsta megni að kynna mér rækilega hvert og eitt af Sporunum, og hafa þau að leiðarljósi í hverju sem ég tek mér fyrir hendur?

Bæn dagsins
Megi ég ekki gera þau algengu mistök að útlista mínar eign lausnir fyrir guði og biðja síðan um samþykki hans á þeim. Megi ég grípa sjálfan mig ef ég er ekki nægilega opinn fyrir leiðsögn guðs. Og passa mig á því að vera ekki að biðja um samþykki hans né velþóknun á því sem ég vil að gerist.

Minnispunktur dagsins
Er ég að leita að velþóknunarstimpli guðs?

Hugleiðing dagsins
Á meðan ég held þrjóskulega í þá sannfæringu að mér nægi að lifa samkvæmt eigin greind og eigin styrk þá er virk trú á minn Æðri Mátt útilokuð. Þetta er sannleikurinn, sama hve heitt ég trúi á tilvist guðs. Trú mín á hið andlega – sama hve einlæg hún er – mun ætíð vera andvana ef ég held áfram að leika guð. Það sem þetta þýðir er að á meðan við setjum traust á okkur sjálf í fyrsta sætið, þá er raunverulegt traust á Æðri Mátt ekki inni í myndinni.

Hve sterk er löngun mín til þess að framkvæma vilja guðs?

Bæn dagsins
Ég bið þess að ég setji ekki traust á sjálfan mig ofar trausti á guð. Megi ég vita að það skapast enginn árekstur af því að taka ábyrgð á eigin gjörðum, sem mér hefur verið kennt að sé kjarninn í því að þroskast, og því að leita til guðs um leiðsögn. Megi ég muna að ef ég held mig við “að gera það sjálfur” regluna, þá er það svipað og að neita að þiggja leiðsögn þegar maður er áttavilltur – og ráfa endalaust um villtur og týndur.

Minnispunktur dagsins
Þroski er að vita hvar hjálpar er að vænta.

Hugleiðing dagsins
Þegar ég sannfæri loksins sjálfan mig um að sleppa tökunum á vandamáli sem er búið að valda mér hugarangri – þegar ég stíg til hliðar og læt guði eftir að takast á við vandann – þá losna ég samstundis við hugarangrið. Ef ég held áfram að flækjast ekki fyrir sjálfum mér, þá byrja lausnir að koma í ljós og ég tek eftir þeim. Ég er farinn að gera mér betur og betur grein fyrir mínum eigin takmörkunum. Og ég er farinn að læra að sleppa takinu og treysta mínum Æðri Mætti fyrir því að koma með svörin og sjá um hjálpina.

Heg ég það hugfast að einungis guð er al-vitur og alls-megnugur?

Bæn dagsins
Ef ég rekst á hindrun, megi ég læra að stíga til hliðar og láta guð um að fjarlægja hana. Megi ég gera mér grein fyrir mennskri takmörkun minni þegar kemur að því að leysa vandamál, því ég get aldrei getið mér til um hvernig guð leysir vandann fyrr en ég sé lausnina. Megi ég vita að það er sama hvaða lausn ég finn, guð hefur líklegast betri lausn.

Minnispunktur dagsins
Guð er með betri lausn.

Hugleiðing dagsins
N. Eldon Tanner (bandarískur stjórnmálaður) sagði, “Þjónusta er leigan sem við greiðum fyrir þau forréttindi að lifa á þessari jörð.” Fyrir flesta spilafíkla í bata, þá er sjálf þjónustan forréttindi, forréttindi sem okkur hafa verið gefin samhliða nýjum leigusamningi fyrir lífið. Að sponsa, hringja í nýja GA félaga eða svara símtali frá nýjum GA félögum getur stundum tekið tíma og heilmikla orku. Þegar ég finn fyrir viðnámi hjá sjálfum mér, lát mig þá muna eftir því öryggi sem ég fann fyrir þegar ég var nýliði í GA og áttaði mig á því að það voru til GA félagar sem vildu hjálpa mér, þegar ég bað um hjálp.

Geri ég mér grein fyrir því að sú þjónusta sem ég veiti í dag er mikilvægur hluti af mínum eigin bata?

Bæn dagsins
Megi ég aldrei gleyma því að það er þjónusta þeirra, sem á undan mér gengu í GA, sem gerði GA prógramið aðgengilegt fyrir mig og bata minn í dag. Megi þjónustan sem ég veiti fúslega í dag verða hjálp í bata annarra á morgun.

Minnispunktur dagsins
Þjónusta í prógraminu eru forréttindi.

Hugleiðing dagsins
Fyrir flest okkar, sem erum í GA samtökunum, er auðveldara að hugsa til þess að “við munum ekki spila í dag” frekar en að “heita” því að spila aldrei aftur. Að segja “ég ætla mér aldrei að spila aftur” er gjörólíkt því að segja “ég mun aldrei spila aftur.” Seinni setningin er þrungin sjálfsvilja; gerir ekki ráð fyrir þeirri hugmynd að hægt sé að fjarlægja þráhyggju okkar fyrir fjárhættuspilum með því að stunda 12 spora batastefnu GA – einn dag í einu.

Ætla ég að halda áfram baráttunni við andvaraleysi og gera mér grein fyrir því að ömurlegt líf geti verið handan næsta veðmáls?

Bæn dagsins
“Aldrei aftur” krefst full mikillar skuldbindingar, jafnvel fyrir þau sterkustu á meðal vor. Fortíð okkar er full af “aldrei aftur” og “mun aldrei”, loforðum sem voru brotin fyrir dögun næsta dags. Megi ég, í bili, einblína á að vera spilalaus bara í einn dag í einu.

Minnispunktur dagsins
Aldrei að segja “aldrei aftur.”

Hugleiðing dagsins
Okkar forni óvinur; sjálfsviljinn – þrjóskan, reynir að villa um fyrir mér með réttlætingum eins og; Því á ég að treysta Guði? Hefur hann ekki gefið mér gáfur til þess að hugsa sjálfstætt? Ég verð að nema staðar þegar slikar hugsanir læðast að mér og gera mér grein fyrir því að ég hef aldrei getað náð markmiðum mínum, einvörðungu með því að treysta á sjálfan mig. Ég er ekki sjálfbjarga, né heldur veit ég öll svörin; bitur reynslan ein sýnir mér það.

Veit ég að ég þarfnast leiðsagnar Guðs? Er ég reiðubúinn til þess að taka við henni?

Bæn dagsins
Ég bið að eftir því sem einurð mín og bindindi vex og eykst, þá muni ég ekki draga úr trausti mínu á æðri mætti. Megi ég halda áfram að biðja minn æðri mátt um leiðsögn, jafnvel þegar mér virðist ganga allt í haginn. Megi ég gera mér grein fyrir að ég þarf jafnmikið á mínum æðri mætti að halda hvort sem mér gengur vel eða þager á bjátar.

Minnispunktur dagsins
Að vera sjálfum sér nógur er guðlaus flökkusaga.

Hugleiðing dagsins
Eitt sinn er ég var á fundi, sem var haldinn í kirkju, sá ég steindan glugga er á stóð “Guð er kærleikur.” Af einhverri ástæðu þá skynjaði hugur minn þessi orð á eftirfarandi hátt; “Kærleikur er Guð.” Þegar ég leit í kringum mig á fundinum þá áttaði ég mig á því að hvorutveggja er rétt, því yfir fundinum sveif andi kærleiks og krafts. Ég ætla að halda áfram að leita uppi þennan kærleik og kraft, þar sem ég fylgi GA prógraminu, eins og líf mitt liggi við – sem það í raun gerir.

Þýðir lífið, fyrir mig, það að lifa lífinu í gleði og þægindum-á virkan hátt?

Bæn dagsins
Megi ég skynja þann kærleiksanda sem gefur bænum okkar styrk. Megi ég finna fyrir einingunni í þessu herbergi, þá samansöfnun kærleks sem gefur fundinum þann kraft sem hann býr yfir. Megi ég finna fyrir þeirri einstöku ást á æðri mætti, sem kærleikur okkar endurspeglar.

Minnispunktur dagsins
Kærleikur er Guð.